Chapter 5

¹seniorem ne increpaveris sed obsecra ut patrem iuvenes ut fratres ²anus ut matres iuvenculas ut sorores in omni castitate ³viduas honora quae vere viduae sunt ⁴si qua autem vidua filios aut nepotes habet discant primum domum suam regere et mutuam vicem reddere parentibus hoc enim acceptum est coram Deo ⁵quae autem vere vidua est et desolata speravit in Deum et instat obsecrationibus et orationibus nocte ac die ⁶nam quae in deliciis est vivens mortua est ⁷et hoc praecipe ut inreprehensibiles sint ⁸si quis autem suorum et maxime domesticorum curam non habet fidem negavit et est infideli deterior ⁹vidua eligatur non minus sexaginta annorum quae fuerit unius viri uxor ¹⁰in operibus bonis testimonium habens si filios educavit si hospitio recepit si sanctorum pedes lavit si tribulationem patientibus subministravit si omne opus bonum subsecuta est ¹¹adulescentiores autem viduas devita cum enim luxuriatae fuerint in Christo nubere volunt ¹²habentes damnationem quia primam fidem irritam fecerunt ¹³simul autem et otiosae discunt circumire domos non solum otiosae sed et verbosae et curiosae loquentes quae non oportet ¹⁴volo ergo iuveniores nubere filios procreare matres familias esse nullam occasionem dare adversario maledicti gratia ¹⁵iam enim quaedam conversae sunt retro Satanan ¹⁶si qua fidelis habet viduas subministret illis et non gravetur ecclesia ut his quae vere viduae sunt sufficiat ¹⁷qui bene praesunt presbyteri duplici honore digni habeantur maxime qui laborant in verbo et doctrina ¹⁸dicit enim scriptura non infrenabis os bovi trituranti et dignus operarius mercede sua ¹⁹adversus presbyterum accusationem noli recipere nisi sub duobus et tribus testibus ²⁰peccantes coram omnibus argue ut et ceteri timorem habeant ²¹testor coram Deo et Christo Iesu et electis angelis ut haec custodias sine praeiudicio nihil faciens in aliam partem declinando ²²manus cito nemini inposueris neque communicaveris peccatis alienis te ipsum castum custodi ²³noli adhuc aquam bibere sed vino modico utere propter stomachum tuum et frequentes tuas infirmitates ²⁴quorundam hominum peccata manifesta sunt praecedentia ad iudicium quosdam autem et subsequuntur ²⁵similiter et facta bona manifesta sunt et quae aliter se habent abscondi non possunt