Chapter 7

¹de quibus autem scripsistis bonum est homini mulierem non tangere ²propter fornicationes autem unusquisque suam uxorem habeat et unaquaeque suum virum habeat ³uxori vir debitum reddat similiter autem et uxor viro ⁴mulier sui corporis potestatem non habet sed vir similiter autem et vir sui corporis potestatem non habet sed mulier ⁵nolite fraudare invicem nisi forte ex consensu ad tempus ut vacetis orationi et iterum revertimini in id ipsum ne temptet vos Satanas propter incontinentiam vestram ⁶hoc autem dico secundum indulgentiam non secundum imperium ⁷volo autem omnes homines esse sicut me ipsum sed unusquisque proprium habet donum ex Deo alius quidem sic alius vero sic ⁸dico autem non nuptis et viduis bonum est illis si sic maneant sicut et ego ⁹quod si non se continent nubant melius est enim nubere quam uri ¹⁰his autem qui matrimonio iuncti sunt praecipio non ego sed Dominus uxorem a viro non discedere ¹¹quod si discesserit manere innuptam aut viro suo reconciliari et vir uxorem ne dimittat ¹²nam ceteris ego dico non Dominus si quis frater uxorem habet infidelem et haec consentit habitare cum illo non dimittat illam ¹³et si qua mulier habet virum infidelem et hic consentit habitare cum illa non dimittat virum ¹⁴sanctificatus est enim vir infidelis in muliere fideli et sanctificata est mulier infidelis per virum fidelem alioquin filii vestri inmundi essent nunc autem sancti sunt ¹⁵quod si infidelis discedit discedat non est enim servituti subiectus frater aut soror in eiusmodi in pace autem vocavit nos Deus ¹⁶unde enim scis mulier si virum salvum facies aut unde scis vir si mulierem salvam facies ¹⁷nisi unicuique sicut divisit Dominus unumquemque sicut vocavit Deus ita ambulet et sic in omnibus ecclesiis doceo ¹⁸circumcisus aliquis vocatus est non adducat praeputium in praeputio aliquis vocatus est non circumcidatur ¹⁹circumcisio nihil est et praeputium nihil est sed observatio mandatorum Dei ²⁰unusquisque in qua vocatione vocatus est in ea permaneat ²¹servus vocatus es non sit tibi curae sed et si potes liber fieri magis utere ²²qui enim in Domino vocatus est servus libertus est Domini similiter qui liber vocatus est servus est Christi ²³pretio empti estis nolite fieri servi hominum ²⁴unusquisque in quo vocatus est fratres in hoc maneat apud Deum ²⁵de virginibus autem praeceptum Domini non habeo consilium autem do tamquam misericordiam consecutus a Domino ut sim fidelis ²⁶existimo ergo hoc bonum esse propter instantem necessitatem quoniam bonum est homini sic esse ²⁷alligatus es uxori noli quaerere solutionem solutus es ab uxore noli quaerere uxorem ²⁸si autem acceperis uxorem non peccasti et si nupserit virgo non peccavit tribulationem tamen carnis habebunt huiusmodi ego autem vobis parco ²⁹hoc itaque dico fratres tempus breve est reliquum est ut qui habent uxores tamquam non habentes sint ³⁰et qui flent tamquam non flentes et qui gaudent tamquam non gaudentes et qui emunt tamquam non possidentes ³¹et qui utuntur hoc mundo tamquam non utantur praeterit enim figura huius mundi ³²volo autem vos sine sollicitudine esse qui sine uxore est sollicitus est quae Domini sunt quomodo placeat Deo ³³qui autem cum uxore est sollicitus est quae sunt mundi quomodo placeat uxori et divisus est ³⁴et mulier innupta et virgo cogitat quae Domini sunt ut sit sancta et corpore et spiritu quae autem nupta est cogitat quae sunt mundi quomodo placeat viro ³⁵porro hoc ad utilitatem vestram dico non ut laqueum vobis iniciam sed ad id quod honestum est et quod facultatem praebeat sine inpedimento Dominum observandi ³⁶si quis autem turpem se videri existimat super virgine sua quod sit superadulta et ita oportet fieri quod vult faciat non peccat nubat ³⁷nam qui statuit in corde suo firmus non habens necessitatem potestatem autem habet suae voluntatis et hoc iudicavit in corde suo servare virginem suam bene facit ³⁸igitur et qui matrimonio iungit virginem suam bene facit et qui non iungit melius facit ³⁹mulier alligata est quanto tempore vir eius vivit quod si dormierit vir eius liberata est cui vult nubat tantum in Domino ⁴⁰beatior autem erit si sic permanserit secundum meum consilium puto autem quod et ego Spiritum Dei habeo