Chapter 13

¹omnis anima potestatibus sublimioribus subdita sit non est enim potestas nisi a Deo quae autem sunt a Deo ordinatae sunt ²itaque qui resistit potestati Dei ordinationi resistit qui autem resistunt ipsi sibi damnationem adquirunt ³nam principes non sunt timori boni operis sed mali vis autem non timere potestatem bonum fac et habebis laudem ex illa ⁴Dei enim minister est tibi in bonum si autem male feceris time non enim sine causa gladium portat Dei enim minister est vindex in iram ei qui malum agit ⁵ideo necessitate subditi estote non solum propter iram sed et propter conscientiam ⁶ideo enim et tributa praestatis ministri enim Dei sunt in hoc ipsum servientes ⁷reddite omnibus debita cui tributum tributum cui vectigal vectigal cui timorem timorem cui honorem honorem ⁸nemini quicquam debeatis nisi ut invicem diligatis qui enim diligit proximum legem implevit ⁹nam non adulterabis non occides non furaberis non concupisces et si quod est aliud mandatum in hoc verbo instauratur diliges proximum tuum tamquam te ipsum ¹⁰dilectio proximo malum non operatur plenitudo ergo legis est dilectio ¹¹et hoc scientes tempus quia hora est iam nos de somno surgere nunc enim propior est nostra salus quam cum credidimus ¹²nox praecessit dies autem adpropiavit abiciamus ergo opera tenebrarum et induamur arma lucis ¹³sicut in die honeste ambulemus non in comesationibus et ebrietatibus non in cubilibus et inpudicitiis non in contentione et aemulatione ¹⁴sed induite Dominum Iesum Christum et carnis curam ne feceritis in desideriis