Chapter 1

¹Sa pasimula pa ay naroroon na ang Salita. Ang Salita ay sumasa Diyos at ang Salita ay Diyos. ²Siya ay sumasa Diyos nang pasimula pa. ³Ang lahat ng mga bagay ay nilikha sa pamamagitan niya. Kung wala siya ay walang anumang nilikhang bagay na nalikha. ⁴Ang buhay ay nasa kaniya at ang buhay ay ang ilaw ng mga tao. ⁵Ang ilaw ay nagliwanag sa kadiliman at ito ay hindi naunawaan ng kadiliman. ⁶May isang lalaking isinugong mula sa Diyos. Ang kaniyang pangalan ay Juan. ⁷Siya ay naparitong isang saksi upang magpatotoo tungkol sa ilaw upang ang lahat ay sumampalataya sa pamamagitan niya. ⁸Hindi siya ang ilaw ngunit siya ay sinugo upang magpatotoo tungkol sa ilaw. ⁹Ang tunay na ilaw ay iyong tumatanglaw sa bawat taong pumaparito sa sanlibutan. ¹⁰Siya ay nasa sanlibutan. Ang sanlibutan ay nilikha sa pamamagitan niya at hindi siya nakilala ng sanlibutan. ¹¹Siya ay pumunta sa kaniyang sariling mga tao at hindi siya tinanggap ng kaniyang sariling mga tao. ¹²Datapuwat ang lahat ng tumanggap sa kaniya ay binigyan niya ng karapatang maging mga anak ng Diyos. Sila ay ang mga sumampalataya sa kaniyang pangalan. ¹³Sila ay ipinanganak hindi sa dugo, hindi sa kalooban ng katawan, ni sa kalooban ng tao. Sila ay ipinanganak mula sa Diyos. ¹⁴Nagkatawang-tao ang Salita at tumahan sa gitna natin. Namasdan namin ang kaniyang kaluwalhatian, ang kaluwalhatian ng bugtong na Anak ng Ama. Ang Salitang ito ay puspos ng biyaya at katotohanan. ¹⁵Si Juan ay nagpapatotoo tungkol sa kaniya. Siya ay sumigaw at nagsabi: Siya ang aking sinasabing, ang paparitong kasunod ko ay lalong higit sa akin sapagkat siya ay una sa akin. ¹⁶Mula sa kaniyang kapuspusan ay tumanggap tayong lahat ng abut-abot na biyaya. ¹⁷Ang kautusan ay ibinigay sa pamamagitan ni Moises. Ang biyaya at ang katotohanan ay dumating sa pamamagitan ni Jesukristo. ¹⁸Walang taong nakakita kailanman sa Diyos. Ang bugtong na Anak na nasa piling ng Ama ang naghayag sa kaniya. ¹⁹Ito ang patotoo ni Juan nang isugo sa kaniya ng mga Judio ang mga pari at mga Levita mula sa Jerusalem. Isinugo sa kaniya ang mga pari at mga Levita upang tanungin siya, Sino Ka? ²⁰Siya ay nagtapat at hindi nagkaila. Kaniyang ipinagtapat: Hindi ako ang Kristo.